ألا يامن لقى جرحي قصيدة في حضن جدران = تأملها على بعد النظر وتحس بأحزاني
أنا جرحً طغى حتى تعدا حاجز الوجدان = صغير السن لكني كبير بجرح وجداني
أنا باقي بقايا شئ يفكر يوم كان إنسان = على هامش سطر وقتي تلاحظني وتقراني
أنا من عانق أحلام التفاؤل وإنكسر خسران = سرى في غيهبٍ مظلم طريقه حيل عناني
وأنا منهو قسى وقته وشرب من قسوة الحرمان = مسافه والسراب أغرا عيوني وخلت غدراني
وأنا من مات أبوي وشلت أمانه ودينٍ وديان = ووصيه شفتها بعينه أكون عيون لإخواني
كسرني الهم يامصعب وفكري سارحٍ حيران = أخفي عبرتي وقلبي تفطر هم وأشقاني
وألا يامن لقى جرحي قصيده كلها أشجان = تأكد مابقى غير الشعر إنسان واساني
وترى ماكل ماتقرا قصيده تعانق الجدران = تحســب إن روحـها جرح ومــــشـاعـرهــا مــن أحـزانـي